أحيانا كل شي بيكون مختلف مش عارف كيف
أحيانا بتشوف شغلة ، ما بتعنيلك شي
بترجع بتشوفها مره ثانية بتعنيلك كثير
أحيانا بتسمع أغنية .. ما بتعنيلك و ما بتوقف عندها لحظة بس بتسمعها بغير موقف بتهزك و بتجمد بأرضك

احيانا ال يوتيوب بيكون برنامج عادي و لطيف و بينقيلك اغاني حلوة تسليك وانت بتشتغل
و احيانا ال يوتيوب بيكون شرير

غريبة أغنية ( القدس مش للبيع ) كثير
ممكن تكون طالع مع صحابك مشوار و تغنوا بالباص بكل حماس و مرح و انو بتصقفو و تضحكو

و ممكن شي مسوية تكون ملقح بالدار بتفكر بألف شغلة واليوتيوب يقرر يحطها
وانت عيونك بتتوسع وبتنشل عمهل
#عالكنبة
راسك سهيان بالسقف
والألف شغلة يلي بتفكر فيهن بصيرو شغلة

من شي مكان بالغرفة حولي طالع صوت " الاغنيه " المميز
بلهجتا العربية المكسرة بتحكي امور بتخلي حلقك ناشف كثير
كلمات سلسة و مرتبة مش عارف كيف

جمل مالها معنى
و بتعني كل شي

ربطت كل شي بكل شي
بدقيقتين و بكلمات مكررة كثير
لخّصت ضياع
و وجع بشع ما بعرف حسه ، اطلعه ، واتوجعه صح
اشياء جوا لدرجة معتمة
صارت بالمقطع الثاني
مش عارف اذ الثالث
بتحكي عن بلدها
مش عارف اذ عن حبيبها
بتحكي عن دمع عن امل و عن وعد انو ترجع
و غنت قصص
رجعت بالاخير .. ما رجعت يمكن
انتحرت بيقولو

شوي شوي صوتها بيخف  ، و بيختفي
و بييطلع صمت عالي كثير
وبيخليك محطم عالكنبة
السقف قدامك مغبش و ما مبين صح
المخدة تحت راسك مي من الطرفين

اليوتيوب كان اليوم شرير كثير