قاعدين ع جنب الطريق
راسه ع كتفها وراسها على كتفه .. ماسكين ايدين بعض , وبيتفرجوا عالغروب , وبيحلموا بهمس , وهواء اول الشتاء البارد بيلعب بأحلامهم وبيطير همساتهم
- عامر .. يا عمورة عمري
- شذا .. يا شظية قلبي
- طيب يعني قديش بتحبني ؟
- ممم .. اطلعي عالسما .. شايفة كم وحدة ؟؟ بتقدري تعديهن ؟ قد عدد القذايف و جرار الغاز والبراميل .. بحبك ..
- طيب ما رح تمل مني ؟؟ لأيمتا رح تضل معي ؟
- ليتحركوا العرب وتخلص الحرب في البلد ..
- يااااا .. كل هالقد بتحبني و مستحيل تتركني ؟؟ 
بتعرف .. انا كثير محظوظة اني انفجر بيتي وشردونا ع الشارع ، و تعرفت عليك  ..
- انا يلي محظوظ انه صارلي خمس سنين ما إشتغلت ، ومن يوم ما طلعت من السجن بالشارع ، لأتعرف على احلى وردة  ..
بسرعة إطلعي لفوق ..  هي مرق صاروخ .. بسرعة تمني امنية .
- مممم .. تمنيت ..
- شو تمنيتي ؟؟
- ما بصير قول .. بعدين ما بتتحقق ..
- اذا ما تحققت ، أرجعي اطلبيها من الصاروخ يلي بعده .. بعد دقيقتين بالكثير ..
- ع أساس ما بتعرف امنيتي ؟ اي لو ما ضل بسما البلد غير صاروخ واحد ..بس يمرق فوقي .. ما رح أتمنى غيرك ..

ضغط الها على ايدها ضغطة خفيفة
و رفعوا راسهم عالسما فوق
و صارو يعدو الصواريخ و القذايف و يتمنوا
و يحلموا بهمس
و هوا اول الشتاء البارد بيلعب بأحلامهم وبيطير همساتهم
و هم بيتفرجو عالغروب