الخميس | 28/03/2024 - 01:40 مساءاً - بتوقيت القدس
تلفزيون السلام - بقلم : وسام العزام- حقيقه العنوان مش من عندي , العنوان للعم غافل للي ما بعرفه , جد مشان الله جوزوني , كل شب بس يتخرج او قبل بحكيها , رح يحكي مشان الله, ترجي يعني , ليش بيترجى؟؟ غريب ليش بيترجى , مع كل السبل المتوافره و بيترجى!! واحد هامل. يحكى انه في شب اسمه سمير , سمير كان ماشي بالشارع بيدخن سجاير “جولد كوست” و بيفصفص بزر , بينما كان سمير يهم برمي السيجاره , رأى ذاك المشهد , سمير شاف زلمه
و مرته قاعدين على كرسي بحديقه عامه مبسوطين و بيضحكوا و بلعبوا الولاد ,يا عيني , كيّف سمير, صار سمير بده يتزوج. مشي سمير بطريقه و بلش يفكر , و مع اول فكره طلع بوجهه الاخ “مجتمع” , قله يا زلمه هو انشب , بعدك وليد مش ولد, لا وليد “يعني اصغر من ولد” و بدك تتجوز يا عيون امك , رد سمير ” فك عني يا زلمه” , راح الاخ مجتمع , اجا محله الاخ“مصاري” و قال: ولك يا مفلس دخانك جولد كوست و بدك تتجوز , يزم هو انت معك حق سندويشة فلافل؟؟ , رد سمير: الله بيسرها , و حل عني انت الثاني , راح الاخ مصاري , اجا الاخ“دراسه”
و قال: وين رايح يا حبيبي , لسا قدامك 4 سنين غير الي راحوا , مش بدك الاخ“مصاري” بجيبتك, اقعد اقعد بلا جواز بلا هم , رد سمير: ما عليك مني , من وين بتطلعولي قاعدين؟؟ خلص روح , وراح الاخ دراسه .
كمل سمير مشيه , تعب و قعد على الرصيف, ولا في زلمه جاي عليه معصب و خبط سمير كف على وجهه و قله , انت بعدك ما شفت اشي , انت عارف مين انا؟؟, لا مين انت؟ انا الاخ“مهر” , ولك من وين بدك تجيبني و تتجوز؟؟, ولا بتيجي اختو للمهر “ام العروس” .
شو يا حبيب امك بدك توخذ بنتنا؟؟ معاك حق صاله بالهيلتون؟ معاك حق الذهب؟ معاك حق جهاز العروس؟ بدك تجيبلها سياره؟ بدك تسكنها بيت ملك؟ معاك,معاك,معاك(على فكره اللائحه ما بتخلص) , سمير: الله يستر عليكو يا اخوان , هدوا شوي , عندي الحل , الحقوني كلكو , طبعان الاخوان “مجتمع,مصاري,دراسه” كانوا موجودين, مشي سمير و وقف عند اول اشاره و بلش يحكي “مشان الله جوزوني, مشان الله جوزوني“…. بحب اوجه كلمه لكل من الاخوان الآتيه اسمائهم
1- حبيبي و صديقي الاخ“مجتمع“, ما بدك تحل عنا , ما بدك توخذ جهلك و غبائك و ترميه بأقرب حاويه؟؟ يا زلمه قرفتنا , على بصير و ما بصير , يا رجل احنا الي بحكمنا الدين مش انت .
2-عزيزي الاخ“مصاري” ما بدك تصير صاحبي الروح بالروح و تقعد معي اكثر من اول خمس ايام بالشهر , اشتقنالك يا زلمه.
3- صديقي“دراسه” اقلك العمر بخلص وانت ما بتخلص , ما زهقت, مني اربع سنين وانا بناطح فيك , يوم بتكسر راسي و يوم بكسر راسك؟؟
4- عزيزي الاخ الغالي كثييييييير كثييير علي و على ابوي والاخ “مجتمع” , اخي “المهر” , لو تخف علي شوي و تجوزني بنت الحلال بكون احسن ما تروح بحق كروزات من “الجولد كوست“.
5- اختي الفاضله “ام العروس” لو اني ابنك بتعملي في هيك؟؟ , مثلا شو بصير لو عملنا العرس بصاله عاديه؟؟
شو بصير لو لبست بنتك اسواره ذهب مش عشره, شو بصير لو استعرنا فستان العرس؟؟ بتفضلي بنتك تقعد بوجهك و تضلي تدوري انت على عريس و تيجي محلي و تصيري تحكي مشان الله تجوزا بنتي؟؟ , توصي فينا , زبطينا , ماشي؟؟؟؟؟ بالنهايه سمير لم يأبه لكل الاخوان و تزوج , بس الحلو بالموضوع النا حكي بالجزء الثاني “مشان الله طلقوني“.
الفجر | 05:10 |
الظهر | 12:44 |
العصر | 04:15 |
المغرب | 06:56 |
العشاء | 08:19 |