الأخبار :
قاعدة خصبة : بقلم : محمد موسى عساكره
السبت | 01/02/2020 - 05:07 مساءاً
قاعدة خصبة : بقلم : محمد موسى عساكره

تلفزيون السلام - فلسطين :  الانسان كتلة من الحواس ، بتقابلها كتلة من العقد
بنحس بكل شي ، و بنحس كثير
كل يوم تصاعديا من صغر كل واحد فينا
بيتفاعل مع كل شي حوليه بحواسه النامية

بشوف وجه اهله ، تجاعيد ايد جدو الكبيرة , شارع .. حارة  من جدار البلكون العالي كثير
بيشم ريحة بيته ، عطر والده يلي مافي اطيب منها , ريحة طبخة اليوم ، او يمكن طبخة مبارح بترجع تتسخن
بيتعرف عملمس سجادة غرفة القعدة هو بيزحف ، ملمس فرشته الناعم بالليل و حرامو الدافي
بيسمع لحن  ، رنة جرس باب  , جرس مدرسة، موسيقى ماله خبر انو رح يقارن الحان الدنيا فيها يوما ما و يعتبرها الاصل
و بيذوق كل شي و بيتبرمج عمحبته
طعم اكل امه ، و بيميزه و بيفضلو عأكل افخم المطاعم
بينعزم عند بيت رفيقه ، و ام رفيقه عاملة اكل
هي كمان ام ، و رفيقه كمان بيشوف طبختا الافضل
بس هو حاسس شي غلط
مش هيك لازم تكون طعمها

وبنكبر
و حواسنا بتكبر
و منبني فوق عاداتا عادات
بنشوف بنسمع بنشم بنلمس وبنذوق اشياء جديدة
بنشوف شوارع و مدن حلوة .. ناشفة
بنشم روايح ، طيبة .. غريبة
بنلمس طبقات ناعمة .. ناعمة زيادة ..
بنسمع الحان جديدة .. وبنشتاق لايام اللحن الاصلي
بنذوق
بنذوق امور ما كنا نعرف انو بتنذاق اصلا
بنذوق خيبة
بنذوق يأس
بنذوق قهر
بنذوق فشل
مين كان بيتوقع انو في طعم للفشل يوم يلي كانت كل خطوة بحياتنا نجاح و الكل عميشجعنا ؟
منذوق دمع

بصغرنا كنا نبكي
بس كثير صعب كنا نذوق الدمع
ما حدا كان يسمح للدمعة تستمر و تدحرج لتصل للثم
دايما كان في مين يمسحها
كان في مين يبكي عنك
او على الاقل يبكي معك

كنا ننحب بلا سبب .. كلنا كنا ننحب
و كبرنا بننحب و بنحب
بس بشروط
ما بننحب مثل ما نحنا
بننحب مثل ما بدهم يانا نكون
وبنحب القدامنا مثل ما بدنا ياه ينحب

بنسعى بكل جوارحنا نغير كل شي
ليبقى مثل ما بنعرف و مثل ما بدنا

الاحاسيس كبرت و اختلفت
بس قاعدة المقارنة نفسها .. ما تغيرت

و معها صرنا نقارن و نتعب
و نشتاق

الكل بيشتاق
بس نحنا بنختلف
لانو بنشتاق و بس
ما بنشبع هالشي
لانو ما رح نرجع

وبنترك شوقنا جوا ، ينخر و يجرح ، لحتى ننسى و الجرح يتخثر و يندمل
و قاعدة المقارنة تتلاشى
و تصير بعيدة

و بنصير نشوف اي بلد حلو
ملمس اي شرشف ناعم
صوت اي لحن عذب
ريحة اي مكان مألوفة
و طعم اي أكلة ذكية

وبنتعود وبنعيش

بس ما بيمنع
كل فترة
كل فترة تجينا نوبة
ضربة عالراس
نفضة للجسم

و منحس بشي غريب
انو كل شي غلط
لمعة بالراس
منتذكر كل شي لثانية

هيك كان شكل القدس؟ و هيك كان لونها ؟
هيك كانت ريحتها ؟ ؟
هيك كان ملمسا ؟ و هيك كان صوتها ؟

فترة عيونك فيها بتشوف اكثر من اللازم
و بترجع بعدها لعماها
و بتقتنع انو هاي هي القدس ولووو
و انو مش شايفة غيرها من قبل

وبنرجع عميان
وبنرجع مرتاحين
وجنبنا جيل جديد
بيبني ذكريات جديدة

و قاعدة مقارنة جديدة
قاعدة خصبة
لعقد دفينة

اليوم نحنا بهالفترة
اليوم عيونا مفتحة كثير
وبتشوف زيادة

بكرا بنرجع
لوقتها
رح نضل نشوف مسجدنا القديم
و نشم ريحته
و نسمع صوته
و نلمس قهره


لوقتها راح نرجع
 

 





التعليـــقات

اعلان خارجي
 
طقس فلسطين

أوقات الصلاة
الفجر 03:52
الظهر 12:39
العصر 04:20
المغرب 07:46
العشاء 09:26
استفتاء السلام
هل تتوقع وصول العالم للقاح فعال ضد فيروس كورونا؟
0
0

ينتهي التصويت بتاريخ 22/04/2020

كيف تحضر جسمك لصيام سهل؟
تلفزيون السلام - فلسطين :  تفصلنا أيام قليلة على شهر رمضان، فترة يفضل أن يتم استغلالها لتهيئ ...
الغذاء السليم والرياضة وجهان لعملة واحدة مع المدرب الرياضي و ...
تلفزيون السلام - فلسطين :  كثيرٌ ما يدور في جَعبَتنا ويلمع في أذهاننا موضوع الحفاظ على الرشاقة ...
الرياضة التي استحوذت على اهتمام شباب العصر مع المدرب الرياضي ...
الرياضة التي استحوذت على اهتمام شباب العصر مع المدرب الرياضي وخبير التغذية والغذاء محمد إبراهيم زيادة( روني الحنيطي ...
فوائد مذهله ... ماذا يحدث للجسم عند تناول اللوز يوميا؟
 تلفزيون السلام - فلسطين : كشفت الدكتورة سينتيا ساس، أخصائية التغذية الأمريكية الشهيرة، ماذا يحدث في الجسم ...
عصير الرمان يقوي جهاز المناعة
تلفزيون السلام - فلسطين  : عصير الرمان هو مصدر استثنائي لفيتامين A، C و E والمعادن مثل ...